يالقصير قرب وشد حيلك لوسمحت

هذه محاورة قديمة جرت بيني وبين الشاعر محمد مقحم المقحم "الماهر"في منتدى بلي الرسمي بتارخ 2009/3/13م

الماهر

يالقصير قرب وشد حيلك لوسمحت

يوم شفت اسمك ظهر قلت فرصه سانحه

غـايبـاً عـنا لك ايـام بالله وين رحت
الرفـيـق اللـي يودك لــــزوم اتـصـارحـه

القصير

والله اني يوم شفتك على الساحه فرحت
ظاهر اسمك عندنا وانت توك ماسحه
كنت في دار العرب فالبحر غصت وسبحت

وأنت شاعر تحسب اليوم مثل البارحه

الماهر
دامت افراحك وانا عنك يالغالي صفحت
ماحسبتك تجلب الصالحة والطالحة
يوم طبيت البحر كم خسرت وكم ربحت

بضعتك عند النشاما عساها رابحه

القصير

أنته اللي كاتب الخط وانت اللي مسحت

بعد ما جتك المياه العاذبه والمالحه
كاسب النوماس والطيب يالغالي نجحت

والغشيم ليا اعترض بالطريق اصافحه

الماهر

كم عذلتك كم نصحتك ولكن مانتصحت

ياكثر ماشـفت غيرك لـسانه فاضحه
مايسرك مدح نفسـك لو الحالك مدحت

والغشيم انكان ماعجبك فعله مادحه

القصير

اللسان حصان يا لاجودي لك شرحت

مافهمت الدرس وافكاركم سارحه
يالعتيبي ينشرح بالي ليا انك فلحت

وثق الخطوة وأنا خطوتي واضحه

الماهر

يازعيم القاف وشبك عن المغزى شطحت

واعسى مـاخانـتك يالخـبير القارحه
كـنـك اتـكهــربت مـني وانا لـك ماجـرحـت

يابلي كب النصيحه وهي من صالحه

القصير

ننهضك ياوسيع العرف لكن طحت

كلمة الجد غير الكلمة المازحه

كان من صالحه جات النصيحه نزحت

لاتجي هرجة مني لها جارحه

الماهر

مايضر الضلع لو له بقرنينك نطحت
الجبل راسي وقاسي ياكيف اتناطحه
ياحليـلك كل ماشـفت لك غبه جمحت

يامهاوي صـالـحـه والثنايا طافحه

القصير

كل ما طول المشوار ياشين نحت

تفرح الشامتين او تحزن النايحة
والله اني أنا عن ديرتي ما نزحت

وانت ودك تغش الناس بالطامحه

الماهر

يالقصير لو تطول المساري ماسترحت

والعذول الشامت اله الهبوب اتلافحه
انتزحت وكلما ضاعت اعلومك صدحت

والغشش كانه سرابك عليك اتكافحه

القصير

المساري لوتطول من المسرى طرحت

والرعد والبرق يادوب تبصرلايحه
ساريٍ مسرى العجم لاغتبقت ولاصطبحت

والسلام ختام والعود يكفي فايحه